دە قی، وتارێكی خاتوو گەلاوێژ لە ساڵیادی كۆچی دوایی مامۆستا برایم ئەحمەدا، لە ژمارە 2150-ی ڕۆژی شەمە 20\5\2000 دا لە ڕۆژنامەی كوردستانی نوێ بڵاو بۆتەوە......
وتاری بەڕێز خاتوو گەلاوێژ هاوسەری مامۆستا ئیبراهیم ئەحمەدی نەمر
بسم الله الرحمن الرحیم
خۆشەویستان خوشك و برایانی بەڕێز،كۆمەڵانی وەفاداری كوردستانی ئەزیز كە هەمیشەو هەردەم لەناو دڵە گەورەكەی مامۆستا ئیبراهیم ئەحمەدا بوون،ئێوەی خۆشەویست بەدرێژایی ژیانی لەبیرو هۆش و هەستیدا وا جێگیر ببوون،كەمە گەر هەر مەرگ توانیبێتی دوورتان بخاتەوەو جیاتان كاتەوە لەدەروون و ویژدان و بەرز و بێ وێنەی.
باوكی (هێرۆ) كوردستانی بوو،بڕوای بەسنوور و ئەم پارچە و ئەو پارچە نەبوو،كە ئەگوترا سنوور ئەیگوت بڵێن سنووری دەستكرد.
ئازیزانم نازانم لەكوێوە دەست بكەم بەباس،بێ گومان زۆرتان بیستووە لە بابەت لە ئەدەب و نووسین و شیعرەكانییەوە،ئەو شیعرانەی كەهەرچەند لە ژمارەدا كەمن، بەڵام لەبەهاو مەعنادا ئەوەندەی دەریایەكی بێ پایانن .هەروەها باسی سیاسەتمەداری و نووسینە بەجۆشەكانی، سەروتاری رۆژنامەكانی (خەبات) و(النور) و نامیلكەی (الاكراد و العرب) كەكاتی نووسینی ئەگەرێتەوە بۆزیاتر لەشەست ساڵ پێش ئێستا،كەچی هەر نوێ ئەبێتەوە،چیرۆكەكانی گۆڤاری(چریكەی كوردستان) كەلە هەشتاكاندا لە دەوروبەری و ئاوارەیی لەلەندەن دەری ئەكرد، بەدەستی خۆیی تایپی ئەكرد و فۆتۆكۆپیی ئەكردو ڕێكی ئەخست،تەنیا بۆبەرگ تێگرتن ئەیناردە بازاڕ.هەموو ئەم كارانە هەر خۆی ئەیكرد،چونكە پارەی ئەوەی نەبوو لە چاپخانەكان بۆی چاپی بكەن. (چریكەی كوردستان) هیچ كەمی یەكی نەبوو لەگۆڤاریی (گەلاوێژ)ی بەناوبانگ كەباسی هەموو ئەو كارانەی بكەم،رەنگە تابەیانیش لێ نەبمەوە،بۆیە دێمە سەر باسی لایەنی ژیانی خێزانی تایبەتی خۆی،كە چ مرۆڤێك بوو . چەند راست و پاك و دڵسۆز بوو.
وەك مەسەلە میسریەكە گوتەنی (فقد كان انڤف من النڤافە واشرف من الشرف).بەڕاستی ئەم رەوشت و خوو رەفتاری باوكی هێرۆ زۆر لەجێی خۆیانەو ئەوەشێتەوە.ئێستاش كەڕۆیشت سامانێكی لەدوای خۆی بەجێ نەهێشت،جگە لە ڕێبازو مەبادیئو پەرستنی كوردستان،لەكاتێكا ئەگەر بیویستایە خاوەنی ملیۆنەها یا هیچ نەبێ خاوەنی سەدان هەزار ئەبوو،بەڵام ئەورێگای خەبات و تێكۆشان و خۆنەویستی و ژیانی لەپێناو دوارۆژی كوردداهەڵبژارد،ئەوەش جێی شانازیە بۆمن و مناڵەكانی و بۆ هەموو كوردێكی دڵسۆز.
خۆشەویستان: ئێمە هەشت مناڵمان هەیە تەنیا سێ مناڵم خوێندنی تەواو كردو شەهادەی وەرگرت،هەموو ئەوانی تر لەبەر دەربەدەری و شارەو شار خوێندنیان لەكیس چوو،هیوایان هەبوو ئەگەیشت چوری كولیەی گب یا علوم ،لەپڕ ئەبوو ئەبوو ئەو وڵاتە جێ بهێڵین و بڕۆینە شوێنێكی تر،تەنیا هەر كچە بچكۆلەكەم كە هەر لەلەندەن خوێندنی تەواو كرد،توانی كولیە تەواو بكات و دكتۆرا وەرگرێت لەگەڵ(هەڵۆ) ی كوڕم چەندەها جار تێ ئەڵچووەو سەرلەنوێ دەستی پێ كردەوە،چونكە لەلەندەن ئیعترافیان بەخوێندنەكەیان نەئەكرد و ئەبوو سەرلەنوێ دەست پێ بكەنەوە،برای بەڕێزو خۆشەویستم دكتۆر كەمال فوئاد ئاگادارەو زەمالەیەكی بۆ (هەڵۆ) پەیدا كرد كەتوانی خوێندنەكەی تەواو بكات و لە دوایشدا دكتۆرا تەواو بكات و لە دوایشدا دكتۆرا وەرگرێت.كە ئەمبۆڵاند و ئەم وت وەرە لەو هەموو مناڵەمان هەموو بێ دواڕۆژ دەرچوون و كەسیان شەهادەی وەرنەگرت پێی ئەگوتم قەیناكا گوێ مەدەرێ هەر سەریان بەرزبێت بەسە.شەهادەو دواڕۆژی چاك بەسەر شۆڕی باهەر نەبێت.
لەماوەی 53 ساڵی پێوەندیمان لەگەڵ یەكدا ساڵانێكی زۆر لەیەك دوور بووین،ئەویش یا بەهۆی حەپس گیرابوو،یا خۆی شاردبووەوە لە حكومەت،كە بەبێ وچان بەدوایەوەبوون و بۆی ئەگەڕان،یا لەشاخ و داخ ئەشكەوتە پیرۆزەكانی كوردستان بوو لەناو پێشمەرگە قارەمانەكاندا لەناو جەرگەی مەیداندا بوو،وەكو لەیەكێ لەشیعرە بەرزەكانیدا ئەڵێت.ئەو ماوەیەیەی بەتێكڕایی پێكەوە بووین،دوای رێككەوتنەكەی جەزائیرو هەرەس پێهێنانی شۆڕشی كوردستان بوو واتا لەساڵی 1975 داو گیرسانەوەو جێگیربوونمان لەلەندەن.
باوكی (هێرۆ) لەناو خێزان و ماڵدا زۆر پیاوێكی سادە و بێ ئەرك و ئاسان بوو،چ لەخواردندا كەهەر نان و ماستەكەت لەبەردەم دابنایە نەیئەگوت بۆ !!!.لەڕووی جلوبەرگ و كەلوپەلی ناو ماڵ و فەنتازی یەوە ئەوە هەر بڕوای پێ نەبوو،زۆرجار لەسەر ئەوە لێم ئەبوو بە قڕە،ئەمگوت چەندە ها جار ماڵمان كردو ماڵمان دانا،لەبەر زرووف و دەربەدەری بەجێمان هێشت و رۆیشتین،براو تاڵان كرا،ئیسراحەتمان نەكرد ،ئێستە بەم ئاخیری عومرەوە ئەتەوێت هەر مێزو كورسیە كۆنەی كەنیسەكانی لەندەن بكڕین،پێی ئەگوتم مایەی سەربەرزیە كەنیمانە شتی باشتر بكڕین.
بوكی( هێرۆ) مناڵ و نەوەكانی لەخۆی خۆشتر ئەویست،بەڵام هەرگیز فەرقی نەئەكردن لەگەڵمنداڵی فەقیرو بێ چارەو لێ قەوماون،حەزی ئەكرد خێرێك بۆ مناڵەكنی هەبێت و بۆ ئەوانیش هەبێت.هەروەها باوكی(هێرۆ) مام جەلالی زۆر زۆر خۆشدەویست زۆر جار ئەیگوت خەڵك وائەزانێ لەبەر ئەوە مام جەلالم خۆشدەوێت چونكە زاوامە .ئەوان نازانن بۆیە زاوامە،چونكە خۆشم ئەویست.لەبەر خووی و رێباز و هەڵوێستەكانی بەرزی.
باوكی(هێرۆ) زۆر حورمەتی دایكی ئەگرت و هیچ كات فیداكریەكانی لەبیر نەئەچوو،كە چۆن لەچنگی پۆلیس و ئەمن و عەسكەرەكانی حكومەتی بەغدا مناڵەكانمای بەخێو كرد و ئێمەی پاراست و ژیان و گیان و حاڵی لەسەر داناین.
باوكی (هێرۆ)ئەوەندە بەڕەحم بوو،دڵە گەورەكەی پڕ لەبەزەیی بوو،تەنانەت حەیوان و جانەوەرو تەیرو سەگ و پشیلەشی لەبیر بوو،زۆری شەوان لەلەندەن بەدزی منەوە گۆشت و ئێسقان و خواردەمەنی ئەخستە كیسەوە و ئەیبردە بەر دەرگاو باخە بچكۆلەكەمان،كە ئەم گوت ئێرە لەندەنە،خەڵك بۆ حەیوانەكانیشیان بەقەد خۆیان خواردن ئەكڕن،لەوانەیە خاوەنەكانیان بزانن بچن شكاتمان لێ بكەن،ئەم پشیلانە فێری ماڵی ئێمە بوون،باخەكەمان هەمووی پیس ئەكەن،ئیگوت تخوا قەیناكا هەندێكیان تێریان ناكەن ئەوەتا دێن لەناو زبڵەكەی ماڵمان دەگەڕیِن بۆ تەیرو پەرندەش.
ئەوە هەر باس ناكرێت،سەقفی ماڵەكەمان بەجارێك رزیوەو هەڵوەشاو،چونكە ئەو پەنجەرە بچوكانەی كە كراون بە (احتیاگ) ،نەوەكو كورەی ئاگر یا دوكەڵ كێشەكان خراپ ببن و بگیرێن ئەوكات لەو پەنجەرە بچوكانەوە چاك ئەكرێنەوە،ئەو ئەچوو بەكراوەیی جێی ئەهێشتن و ئەیگوت تەیرو كۆترو چۆلەكە گوناهن،زستانەو زۆر ساردە با پەنا ببەن بۆ ئەوێ.
پێش نەخۆشییەكتوپڕەكەی ئەم جارەی،رۆژێك چوو بۆ بازاڕ، لەسەنتەرەكە كۆتر هەبوون كیسەیەكی لەگیرفانی دەرهێناو وردە نانی تیابوو بۆی هەڵڕشتن،كابری گسكدەر،وتی مەستەر وانابێت،ئێرەم تازە پاك كردۆتەوە وا دیسان پیست كردەوە،لەوەڵامدا گوتی، ئەگەر من پیسی نەكەم و هەموو شوێنێك بەپكی بمێنێتەوە تۆش دەرئەكرێی و ئیشت نابێت،كابرای گسكدەرو ئێمەش چارمان نەم دەستمان كرد بە پێكەنین.
دوو سمۆرەفێری دیوی دەرەوەی باخەكەمان ببون ،كە برسیان ئەبوو ئەهاتن وەكو بەشەر لە پەنجەرەكەیان ئەدا،كەپێمان ئەوت ئاخر پەنجەرەكە زۆر پیس ئەكەن،پێ ئەكەنی و ئەیگوت باپیسی بكەن،تخواكێ دڵی دێ ئەمانە تێر نەكات بەو دەستە بچكۆلانەوە ئەدەن لە پەنجەرەو لووت ئەنێن بەشوشەكەوە.
ئازیزان:دیارە ئێوەی خۆشەویست حەز ئەكەن هەندێ لەپەیوەندی من و ئەو بزانن،زۆر خەڵكی نزیكمان بەباشی ئەیانزانی و هەستیان ئەكرد كە چەند دڵی منی ئەویست و چەند پێمەوە بەسترابووبەڕادەیەك زۆر جار لەخۆم بایی ئەبووم و لە دڵی خۆما ئەمگوت:بووە پیاوێك ئەوەندە هاوسەرەكەی خۆش بوێت؟ئەوەش لەبەر ئەوەی بڕوای زۆری بەمن هەبوو و ئەیناسیم كە چۆن ژن و دایكێكم،بۆیە هیچ كات بێ دڵی نەئەكردم.
ئەو هانی دام كەچیرۆك بنووسم،بەڵام بەهیچ جۆرێك هەقی نەبوو بەسەر بۆچون و نووسین و بیرەكانمەوە،ئوسلوبی نوسینی چیرۆكی ئەو لەگەڵ من زۆر جیاوازە،كەچی هەنێ كەس وائەزانێ ئەو ئەم چیرۆكانەی بۆنووسیوم و من چۆن توانیومە ئەمانە بنوسم ،بێ گومن ئەو زۆر زاتی خستوەتە بەردەمم و هانی داوم،كەیەكەم چیرۆكی(بەر لە ئەشكەوتی دلێران)م پیشان دا كە ئاخۆ وا باشە ؟دەستی دا بەپشتماو داو وتی ئەی ئافەیرن لەسەری بڕۆو مەترسە،لەگەڵ ئەوەشا خۆم لە مناڵیەو لە قەڵەم و كاغەز جیانەبوومەتەوە،لە هەموو كات و زروفێكدا لە ژێر بۆردومن و لەناو ئەشكەوت و كونە تەیارەشدا جارو با هەنێ شتی بچوكم ئەنووسی،بەڵام كەویستم چیرۆكی(500) لاپەڕەیی بنووسم،ئەوكارە بۆ من سامنك و پڕ لە مەسئولیەت بوو،چیرۆكی (بەرەو ئەشكەوتی دلێران) بەو هەموو لاپەڕە زۆرەوە لە هەشتاكانداباوكی هێرۆ خۆی بۆی تایپ كردم بەدەستی خۆی،برادەرێكی زەحمەتكێشیش بە هەوڵ و كۆششی خۆی لەسوید بۆی چاپ كردم، كە هەمیشە ئەو چاكەیەم لەبیر ناچێتەوە .
بەراستی هەرچی بڵێم و هەرچەند بڵێم هێشتا هەر كەمە،باوكی (هێرۆ) هیچ كات جێی پڕنابێتەوە لە دڵما كەلێنێكی زۆر گەورەو ئازاراوی خستە ژیانمەوە ...بەڵام خۆشەویستی دەربڕین و بەتەنگەوە بوون و پەرۆشی بێ پایانی خەڵكی كوردستانی شیرین بەهەموو پارچەكانیەوە زۆر كاری تێ كردم و ورەی بەرز كردمەوە نائومێدی لە دڵدا نەهێشتم.
یەكێ ئەوەندە بەرێزو خۆشەویست بێ لای میللەتەكەی،ئەبێ من پێی سەربەرز بم و شانازی پێوە بكەم،وابزانم باوكی (هێرۆ) هەر زیندووە و لەماڵەوە چاوەڕێم ئەكا..،نەسامانی هەموو كەون و جیهان و نە عیمارەو(ناگحات السحابی)ی هەموو عالەم ،یەك ساتی ئەو هەموو خۆشەیستیەی میللەت ناهێنێ..،باوكی(هێرۆ) بەسەربەرزی ژیا و بەسەربەرزی مرد،من زۆر فەخرو شانازی پێوە ئەكەم،تاهەم ماوم لە یادە شیرینەكانیا ئەژیم و ئەمێنم،تائەوكاتەی منیش ئەچم بۆلای.
ئیتر زۆر سوپاسی هەستی بەرز و پیرۆزتان ئەكەم ،زۆر زۆر سوپاسی بێ پایانی وەفاداریی و خۆشەویستی دەربڕینی كۆمەڵانی هەرچوار پارچەی كوردستانی ئازیز ئەكەم و هەربژین بە سەرفرازی.